کار خوفناک حادثے کا شکار، 4بھارتی کھلاڑی چل بسے

بھوپال (نیوز ڈیسک) بھارتی ریاست مدھیہ پردیش میں ٹریفک حادثے میں بھارت کے چار قومی سطح کے ہاکی پلیئر ہلاک اور اور تین زخمی ہوگئے۔بھارتی میڈیا رپورٹس کے مطابق حادثہ پیر کی صبح بھوپال کے جنوب میں 70 کلومیٹر دور ضلع ہوشنگ آباد میں اس وقت پیش آیا جب کھلاڑی ایک ٹورنامنٹ کا سیمی فائنل کھیلنے کےلئے جارہے تھے کہ مخالف سمت سے آنےوالی جیپ کو بچاتے ہوئے ان کی کار بے قابو ہوکر ایک درخت سے جا ٹکرائی، تصادم اس قدر شدید تھا کہ 4 کھلاڑی موقع پر ہی دم توڑ گئے۔لاشوں اور زخمیوں کو ہوشنگ آباد کے پرائیویٹ ہسپتال منتقل کیا گیا۔ہلاک ہونے والے کھلاڑی مدھیا پردیش ہاکی اکیڈمی کے ٹرینی تھے اور نیشنل ٹورنامنٹ میں اکیڈمی کی نمائندگی

کرچکے تھے،ہوشنگ آباد کے سپرنٹنڈنٹ آف پولیس ایم ایل چھاری کا کہنا ہے کہ بظاہر حادثہ لاپروائی کے ساتھ ڈرائیورنگ کا نتیجہ لگتا ہے، حادثے کے وقت کار ہائی سپیڈ پر تھی۔مدھیا پردیش کے سپورٹس ڈائریکٹر ایس ایل تھاؤسین کا کہنا ہے کہ ٹورنامنٹ کے دوران تمام کھلاڑی ہوشنگ آباد ہی میں قیام پذیر تھے، اتوار کو ایک کھلاڑی آدرش کے والدین نے کوچ سے درخواست کی تھی کہ اسے سالگرہ کی تقریب میں شرکت کےلئے اتارسی آنے کی اجازت دی جائے۔دونوں اضلاع کے درمیان فاصلہ صرف 18کلومیٹر ہے لہٰذا کوچ نے اس شرط پر اجازت دےدی کہ واپسی کے وقت رات میں سفر نہیں کریں گے، تاہم حادثہ دن کے وقت پیش آیا۔حادثے کے بعد ٹورنامنٹ کا سیمی فائنل ملتوی کردیا گیا ہے۔